Toshkent viloyati Ekologiya, atrof-muhitni muhofaza qilish va iqlim o‘zgarishi boshqarmasi Yangiyo‘l tuman bo‘limi davlat inspektorlariga nisbatan xizmat vaqtida noma’lum shaxslar tomonidan bezorilik harakatlari sodir etildi.

Joriy yil 4-yanvar kuni Yangiyo‘l tumani Samarqand MFY hududida tuman Ekologiya bo‘limi boshlig‘i A.N. hamda bosh mutaxassis A.J. navbatdagi nazorat reyd tadbirlarini olib borayotgan paytda ularga nisbatan bezorilik jinoyati sodir etilgan.

XAbarda aytilishicha, 4 nafar noma’lum shaxs o‘zlarining «Jiguli» rusumidagi mashinasida ekologiya inspektorlarining yo‘lini to‘sib, xizmat faoliyatiga to‘sqinlik qilgan. Xodimlar o‘zlarini tanishtirish maqsadida xizmat guvohnomalarini taqdim etgan vaqtda esa huquqbuzarlar ularga tashlanib, turli tan jarohatlari yetkazgan va kiyimlarini yaroqsiz holatga keltirishgan.

Inspektorlarga Yangiyo‘l tumani markaziy shifoxonasida birinchi tibbiy yordam ko‘rsatilgan. Ularning ahvoli o‘rtacha darajada deya baholanmoqda.

Hozirda ushbu holat Yangiyo‘l tumani IIB tomonidan o‘rganilmoqda.