Afrika qit’asi yerda 3 200 kilometrdan uzunroq yoriq hosil bo‘lishi oqibatida ikkiga bo‘linib ketishi mumkin. Bu haqda Bild yozmoqda.

Sabab: doimiy harakatdagi tektonik plitalar. Ilk alomatlar 2005-yilda Efiopiya cho‘lida 50 kilometr uzunlikdagi yoriq hosil bo‘lishi bilan ko‘ringandi. Navbatdagi yer yorilishi 2018-yilda Keniyada kuzatildi: uning chuqurligi 15 metr, kengligi 20 metrgacha, uzunligi bir necha kilometrga yetgandi.

Umuman olganda, buyuk Afrika yorig‘i 30 million yil burun paydo bo‘lgan. Afrika plitasi sharq tomonidan sinib, yangi — Somali plitasi hosil bo‘lyapti.

Olimlarning hisob-kitoblariga ko‘ra, yorilish nafaqat insoniyat tarixi, balki geologiya nuqtai nazaridan ham juda tez kechmoqda. Yer silkinishlari jarayonni yanada jadallashtirib yuborishi mumkin.

Afrikadagi yer yorig‘i yiliga 0,8–2,5 santimetrga kengaymoqda. Somali, Efiopiya, Tanzaniya to‘liq va Keniyaning yarmi oxir-oqibat Afrika yaqinidagi ulkan orolga aylanishi mumkin. Yana bir tomondan, ilgari dengizga chiqish yo‘li bo‘lmagan Zambiya va Uganda yangi hosil bo‘lgan okean bo‘yidagi mamlakatlarga aylanadi (albatta, hisob-kitoblar taxminiy).