Salim Abduvaliyev salomatligidagi muammolar tufayli ozodlikka chiqdi. U o‘tgan yilning mart oyida 6 yil muddatga ozodlikdan mahrum etilgan edi.

«Kun.uz» nashrining o‘z manbasiga tayanib xabar berishicha, xalq orasida «Salimboyvachcha» nomi bilan taniqli S.Abduvaliyev jazoni ijro etish muassasasidan 12-yanvar kuni sog‘ligidagi muammolar tufayli ozod qilingan.

75 yoshli Abduvaliyev 2023-yilning dekabrida o‘qotar qurolni qonunga xilof ravishda saqlashda gumonlanib ushlangan va Jinoyat ishlari bo‘yicha Mirobod tumani sudi 2024-yil 19-mart kuni uni JKning 248-moddasi (O‘qotar qurolning, o‘q-dorilarning, o‘qotar qurol asosiy qismlarining, portlovchi moddalarning, portlatish vositalarining yoki portlatish qurilmalarining qonunga xilof muomalasi) 2-bandi bilan aybdor deb topib, 6 yil muddatga ozodlikdan mahrum qilgan edi.

«Salim Abduvaliyev xastaligi tufayli 2025-yil 12-yanvar kuni JKning 75-moddasi tartibida jazodan ozod qilingan va ozodlikka chiqarilgan», – deb yozmoqda nashr.

Ma’lumot uchun, JKning 75-moddasi (Kasallik yoki mehnat qobiliyatini yo‘qotish oqibatida jazodan ozod qilish)  hukm chiqarilganidan keyin jazoni o‘tashga to‘sqinlik qiladigan og‘ir kasallikka chalingan shaxs jazoni o‘tashdan ozod qilinishini nazarda tutadi.