Европа Иттифоқи Россияга қарши санкцияларнинг 16-пакети доирасида Россиянинг 13 та банкини SWIFT тўлов тизимидан узди. Бундан ташқари, ЕИ Россиянинг EADaily, Lenta ва NewsFront каби саккизта оммавий ахборот воситаларини Европада эфирга узатишни тақиқлади. Шунингдек, 48 та жисмоний ва 35 та юридик шахс ҳамда «соядаги флот»нинг 74 та кемаси қора рўйхатга киритилди.

ЕИ Кенгаши томонидан чоп этилган пресс-релизда айтилишича, «Россия банк-молия тизими учун муҳим ҳисобланган 13 та минтақавий банкларга тақиқни кенгайтиришга қарор қилинган».

Евроитифоқ, шунингдек, Россияга экспорт қилиниши тақиқланган товарлар рўйхатини кенгайтирди. Унга кўра, бу товарлар «Россия ҳарбий тизимларини ривожлантираётган ва ишлаб чиқаришни қўллаб-қувватлаётган» бўлиши мумкин. Улар, хусусан, учувчисиз учиш аппаратларини бошқариш учун фойдаланилаётганлиги тахмин қилинади. Бундан ташқари, Европа Иттифоқи Россия орқали кимёвий моддалар, пластмасса ва каучукнинг айрим турларини экспорт қилиш ва транзитга, шунингдек, бирламчи алюминий импортига қўшимча чекловлар киритди.

Эслатиб ўтамиз, Россия-Украина урушига бугун, 24 февраль куни роппа-роса 3 йил тўлди.