Joriy yilning 1 aprel kuni tunda Buxoro shahrida aka-ukalar tomonidan uyushtirilgan manyovr ayanchli yakun topdi, deya «Xabar.uz»ga ma’lum qilmoqda Buxoro viloyati IIB JXX YHXB Axborot xizmati boshlig‘i, kapitan Ulug‘bek Shukurlayev.

Ta’kidlanishicha, Buxoro shahrida yashovchi 19 yoshli A.J. va Buxoro shahridagi 1-umumiy o‘rta ta’lim maktabining 11-sinf o‘quvchisi, voyaga yetmagan 17 yoshli R.J.lar avtomashina boshqarish huquqini beruvchi hech bir hujjati bo‘lmagan holda otasiga tegishli bo‘lgan Gentra va Monza avtomashinalarni tunda boshqarib chiqib, shahar ko‘chalarida xavfli harakatlarni amalga oshirishgan.

O‘z haddini bilmay, istagancha mashina boshqargan aka-ukalar kelishgan holda bir nuqtada qarama-qarshi harakatlanib, uzaro to‘qnashib ketgan. Oqibatda har ikkala avtomashina haydovchilari hayoti uchun xavfli bo‘lgan jiddiy tan jarohati bilan kasalxonaga olib ketilgan.

«Rul boshqaruvida bo‘lgan bolalarning xatti-harakatlariga ota-onalar bosh sababchi. Chunki, bolalariga avtomashinani boshqarishni begonalar emas, o‘z ota-onasi o‘rgatadi. Qolaversa, avtomashina kalitini ham o‘z qo‘llari bilan topshirib qo‘yishadi. Har ikkala avtomashinaga ham jiddiy texnik zarar yetgan va ular  jarima maydoniga joylashtirildi. Ota-onalardan ham iltimos va ham talabimiz shu:  bolalaringizni o‘z qo‘llaringiz bilan o‘lim sari yullamang va ko‘rganlaringizdan bugun xulosa chiqaring» – dedi Ulug‘bek Shukurlayev.

Bildirilishicha, bolalarning ota-onasi bundan ilgari ham maktab ma’muriyati tomonidan bir necha marotaba ogohlantirilgan. Maktabga o‘zini ko‘z-ko‘z qilish uchun doimiy tarzda avtomashina boshqarib keladigan o‘quvchi bir marotaba ma’muriy jazoga ham tortilgan.