AQSh prezidenti Donald Tramp Rossiya rahbari Vladimir Putinning harakatidan darg‘azab bo‘ldi.

Trampga Putinning Ukraina prezidenti Vladimir Zelenskiyning hokimiyati legitimligini shubha ostiga olgani yoqmagan. Putin o‘tgan hafta Zelenskiyning prezidentligi qonuniy ekanini savol ostiga olgan va BMT, AQSh hamda Yevropa mamlakatlari shafeligida Ukrainada muvaqqat boshqaruv joriy etishni taklif qilgan edi.

Saylovoldi kurash davrida Ukraina urushini 24 soat ichida to‘xtatishga va’da bergan Trampga Putinning tinchlik bo‘yicha kelishuvni paysalga solayotgani xush kelmayotir.

“Agar biz Rossiya bilan Ukrainada xunrezlikni to‘xtatish borasida kelisha olmasak va bu hol Rossiyaning aybi bilan ro‘y bersa, men Rossiyadan kelayotgan neftga ikkilamchi bojlar joriy qilaman”, – degan AQSh rahbari.

Tahlilchilarga ko‘ra, Kreml Oq uy taklif etayotgan tinchlik bitimini qabul qilmay, turli-tuman shartlarni ilgari surayotgani sabab Trampning Putindan hafsalasi pir bo‘lmoqda.

Tramp, ayni choqda, Ukraina prezidenti Vladimir Zelenskiyni ham foydali qazilmalar to‘g‘risidagi bitimni yo‘qqa chiqarishda ayblagan.

Prezidentlik lavozimiga kirishganidan ko‘p o‘tmay, Tramp Putin bilan telefon orqali suhbatlashib, Ukrainada tez orada tinchlik o‘rnatilishiga ishora qilgandi.

Bu orada ikki prezident fevral oyi oxirigacha uchrashishi mumkinligi aytildi.

Ammo Vashington tomonidan ilgari surilgan vaqtinchalik o‘t ochishni to‘xtatish va doimiy otashkesim bo‘yicha muzokara o‘tkazish taklifi Moskva tomonidan paysalga solingach, Trampning Putinga nisbatan ritorikasi o‘zgarib bormoqda.

Bunga qadar ikki davlat rahbari bir-birini maqtovlar bilan siylagani, hatto “yog‘li” taklif bilan chiqishgani ma’lum.