Украина президенти Владимир Зеленский 23 февраль куни Киев шаҳрида бўлиб ўтган матбуот анжуманида АҚШ билан музокаралар, Россия билан тинчлик битими имзолаш имконияти каби масалаларга тўхталди.

Россия 2022 йилнинг 24 февралида Украина ҳудудига бостириб кирган эди. Киевдаги матбуот анжумани урушнинг уч йиллиги муносабати билан ташкил этилди.

Зеленский Украинада тинчлик ўрнатиш ва мамлакатнинг НАТОга кириши эвазига президентликдан кетишга рози эканини билдирди.

«Агар тинчликка эришиш учун менинг президентликдан кетишим шарт бўлса, мен бунга тайёрман. Агар шундай шарт қўйилса, мен уни (президентлик лавозимимни) НАТОга аъзоликка алишишим мумкин», – деган Зеленский.

Бу билан сиёсатчи АҚШ президенти Дональд Трампнинг айбловига жавоб қайтарган. Аввалроқ Трамп Зеленскийни «диктатор» деб атаб, президентлик сайловини ўтказишга ундаган эди.

Трамп АҚШ Украинага уруш бошланганидан буён 350 миллиард доллар кўмак берганини ҳам айтган.

Аввал хабар берганимиздек, Оқ уй Киев раҳбариятидан фойдали қазилмаларга оид битим имзолашни талаб қилмоқда. Вашингтон таклиф этаётган ҳужжатга мувофиқ, Украина ўз фойдали қазилмалари орқали АҚШга 500 миллиард доллар компенсация қайтариши керак.

Зеленский Киевдаги матбуот анжуманида маълум қилишича, АҚШ Украинага 350 миллиард доллар эмас, балки 100 миллиард доллар берган, уни ҳам қарз эмас, грант сифатида ажратган. Қолаверса, Оқ уй таклиф этаётган битимда Украинанинг хавфсизлигига доир кафолат кўзда тутилмаган.

«Мен ўн авлод украиналиклар елкасида юк бўладиган битимни имзоламайман», – деган Зеленский.

Унга кўра, хавфсизлик кафолатининг йўқлиги Россия яна такрор бостириб кириши эҳтимолини оширади.

«Украина учун АҚШ ва Европадан хавфсизлик кафолати лозим. Трамп абадий эмас, бизга эса узоқ йиллар учун тинчлик керак», – деган Зеленский.

Украина раҳбари Россия босқинини тўхтатиш, тинчлик сулҳи ва фойдали қазилмалар бўйича битим каби масалаларда АҚШ билан музокара ва мулоқот давом этишини қайд этган.