Туркиянинг Карталкая тоғ-чанғи курорти Grand Kartal меҳмонхонасида 21 январ куни юз берган ёнғин 78 инсоннинг умрига зомин бўлганди. Болу шаҳри прокуратураси олиб борган тергов ва гувоҳларнинг кўрсатмалари мудҳиш ёнғин бинонинг пастки қаватида жойлашган ресторан ошхонасида эрта тонгда бошланганини кўрсатди.

Нонушта тайёрлаётган бош ошпаз Файсал Явер ва унинг ёрдамчилари грилдан фойдаланишаётганида қизиган ёғ бирданига ёниб кетган. Оловни тўғри ўчириш, яъни қопқоқ билан бекитиш ёки ўт ўчиргич (огнетушитель)дан фойдаланиш ўрнига ошхона ходимлари шошиб қолиб оловга сув сепишган. Оқибатда ёнғин янада катталашиб, чор-атрофга тарқалиб кетган.

Олов вентиляция трубалари ва тутун тортиш тизими орқали барча этажларга тарқалган. Вазиятни жиловлай олмаган ошхона ходимлари, бинодан қочиб чиқиб, ёнғинни назоратсиз қолдиришган. Уларнинг хатолари ва ёнган ёғни сув билан ўчириб бўлмаслигини билмаслиги оқибатида жуда кўплаб инсонларнинг ўлимига олиб келган фожиа рўй берган.