Доналд Трамп Вашингтоннинг катта кўчмас мулкни қўлга киритишини назарда тутувчи Ғазо секторидан фаластинликларни кўчириш билан боғлиқ режасини тасдиқлаган. Бу ҳақда CNN хабар бермоқда.

«Буни сиз Қўшма Штатлар эгалик қилиши мумкин бўлган катта кўчмас мулк сифатида ўйлаб кўринг. Биз бу режага аста-секин, шошилмасдан борамиз, амалга оширамиз», – деган Трамп журналистларга.

У яна бир бор Яқин Шарқдаги бошқа давлатлар кўчирилган фаластинликларни қабул қилишлари мумкинлигини таъкидлади ва «фаластинликлар ёки Ғазо секторида яшовчи бошқа одамларга у ерга қайтишга рухсат бериш катта хато бўлиши»ни ва ҲАМАСнинг Ғазога қайтишини истамаслигини таъкидлаган.

Минтақа етакчилари аввалроқ Трампнинг Ғазо аҳолиси учун режасини рад этган эди. CNN бу ҳафта Америка раҳбарининг Иордания қироли Абдулла II билан Оқ уйда бўлиб ўтадиган учрашуви асосий мавзуси шу бўлиши кутилаётганини ёзади.

The Jerusalem Post газетаси Трампнинг режасини шарҳлар экан, Исроил бош вазири Бинямин Нетаняҳу конгрессменларнинг ушбу режани қўллаб-қувватлаши йўлида ҳаракат қилаётганини ёзади. Ўтган ҳафта Вашингтонга ташрифи чоғида Нетаняҳу америкалик қонунчилар билан учрашиб, уларни режани қўллаб-қувватлашга чақирган. Исроил томони, шунингдек, Америка ОАВлари билан фаол алоқада бўлиб, уларни Ғазо аҳолисини кўчиришга кўмаклашишга ундамоқда.