Республикачилар БМТ АҚШ манфаатларини олға сурмаётгани ва мамлакатга бўлган муносабатлари президент Трампнинг «Биринчи навбатда Америка» ғоясига мос келмаётганидан хавотирда ва шу сабабли Қўшма Штатларни ташкилот таркибидан тўлиқ чиқариш тўғрисидаги қонун лойиҳасини тақдим этди.

Fox News телеканали хабарига кўра, тегишли қонун лойиҳаси аллақачон Сенатда тақдим этилган бўлиб, бугун Вакиллар палатасига ҳам киритилиши режалаштирилган.

Қонун лойиҳасида АҚШнинг ташкилот ва унга алоқадор органларидаги аъзолигини, шунингдек, БМТга дахлдор агентликларни молиялаштиришни тўхтатиш таклиф этилади.

Қонун лойиҳасини тақдим этган сенатор Майкл Лининг айтишича, БМТ АҚШ ва унинг иттифоқчиларига нисбатан қарши ҳужумлар ташкил қиладиган жойга айланган ва мамлакат ташкилотни молиялаштиришни тўхтатиши керак. Сенаторнинг фикрича, Трамп сиёсатига кўра, мамлакат хавфсизлигини таъминловчи алянсларга устувор аҳамият бериш учун Қўшма Штатлар ташкилотни тарк этиши лозим.

Ли, шунингдек, БМТ мавжуд бўлган йиллар давомида нималарга эришганини шубҳа остига олади. Унинг таъкидлашича, эътибор ва пулга қарамай, у урушлар, инсон ҳуқуқлари бузилиши ва пандемиянинг олдини олишга муваффақ бўлолмади.

Маълумотларга кўра, АҚШ 2022 йилда БМТга 18 миллиард доллардан ортиқ маблағ ажратган, бу ташкилот умумий бюджетининг тахминан учдан бир қисмини ташкил қилади.

Эслатиб ўтамиз, 4 феврал куни Трамп Қўшма Штатларни БМТ Инсон ҳуқуқлари кенгаши ва БМТнинг Фаластинлик қочқинларга ёрдам ва ишлар агентлиги (UNRWA) таркибидан чиқариш тўғрисидаги фармонни имзолаган эди.