Аввалроқ, Бухоро вилояти Жондорда яшовчи 17 ёшли ўсмирнинг 34 млрд сўмлик (2,6 млн доллар) криптоактивларнинг ноқонуний савдосида гумонлаб қўлга олингани ва айни пайтда иши терговда экани айтилган эди.

Ушбу хабар ижтимоий тармоқнинг айрим фойдаланувчилари томонидан ўсмирнинг катта миқдордаги криптовалютани гўёки ўзи ишлаб топганлиги учун жавобгарликка тортилгани айтилиб, муҳокамаларга сабаб бўлди.

Бир муддат ўтиб эса ИИВ мазкур жиноят иши ҳамда шу турдаги жиноят ишларига доир жиноий қилмишлар тўғрисида тушунтириш бериб, йигитнинг «виртуал валютчик»лик билан шуғулланиб келгани ва бу жараёнда у 7 ой давомида 4 мингдан ортиқ 34 млрд сўмлик шубҳали воситачилик операцияларини амалга оширган ҳолда ўтказилган пулларнинг 0,1-2 фоизи миқдорида воситачилик ҳақи олиб келганини билдирган эди. 

Экология вазирининг маслаҳатчиси Расул Кушербаевнинг ёзишича, 34 млрд сўм «оборот» қилган М.З. жавобгарликка тортилмайдиган бўлди.

«Оддий оиладан чиққан Муроджон Бухоро давлат университетининг иқтисодиёт ва туризм факультети талабаси.

Афсуски унга нисбатан жиноят иши очилиб, тергов ҳаракатлари кетаётганди.

Куни кеча ушбу жиноят иши терговчининг қарорига кўра, ҳаракатдан тугатилибди. Унда Муроджоннинг қилган иши ижтимоий хавфли эмаслиги, айбидан пушаймонлиги, оилавий аҳволи ва ҳоказолар инобатга олинган», – деб хабар беради Кушербаев.