Kecha, 4-aprel kuni, Samarqand shahrida Turizm qo‘mitasi raisi Umid Shadiyev Ozarbayjon Respublikasi Davlat turizm agentligi rais o‘rinbosari Azada Guseynova bilan uchrashdi.

Muzokaralar davomida tomonlar turizm sohasining joriy holati, hamkorlik istiqbollari va qo‘shma turizm tashabbuslarini rivojlantirish masalalarini batafsil muhokama qildilar.

Uchrashuv yakunida «Milliy PR-markazi» davlat unitar korxonasi va Ozarbayjon Respublikasi Turizm kengashi o‘rtasida o‘zaro anglashuv memorandumi imzolandi. Mazkur hujjat Buyuk Ipak yo‘li bo‘ylab yagona sayyohlik yo‘nalishini rivojlantirish va targ‘ib etishga qaratilgan.

Hamkorlikning asosiy maqsadi «Joint Silk Road Highlights Tour» tashabbusi doirasida ikki mamlakatning sayyohlik resurslarini birlashtirish hisoblanadi. Loyiha Markaziy Yevropa mamlakatlarida sayyohlik yo‘nalishlarini birgalikda targ‘ib qilishni, shuningdek, Ipak yo‘lining Boku, Shemaxa, Sheki, Xiva, Buxoro va Samarqand kabi muhim tarixiy joylariga e’tibor qaratishni ko‘zda tutadi.

Memorandum doirasida tomonlar qo‘shma B2B tadbirlari o‘tkazish, roud-shou tashkil etish va xalqaro sayyohlik ko‘rgazmalarida ishtirok etish bo‘yicha kelishuvga erishdilar.

Hujjat imzolanganidan so‘ng, Ozarbayjon delegatsiyasi Samarqanddagi Turizm akademiyasiga tashrif buyurdi. U yerda mehmonlar ta’lim dasturlari, infratuzilma va turizm sohasida kadrlar tayyorlash istiqbollari bilan tanishish imkoniyatiga ega bo‘ldilar.

O‘zbekiston va Ozarbayjon, Ipak yo‘lining markaziy qismidagi yetakchi sayyohlik yo‘nalishlari sifatida, ko‘proq sayyohlarni jalb etish, tarixiy joylarning mashhurligini oshirish va jahon turizm bozorida o‘z mavqelarini mustahkamlash maqsadida strategik hamkorlik o‘rnatishga kirishmoqda. Memorandumning imzolanishi ikki mamlakat o‘rtasidagi sayyohlik aloqalarini kuchaytirish muhimligini ta’kidlab, sohani yanada rivojlantirish uchun yangi imkoniyatlar yaratmoqda.