O‘zbekiston rahbari bugun, 4-aprel kuni Samarqand shahrida bo‘lib o‘tayotgan iqlim forumida so‘zga chiqib, Markaziy Osiyodagi vaziyat haqida to‘xtalib o‘tdi

«Iqlim o‘zgarishi muammolari oziq-ovqat va energiya xavfsizligi bilan chambarchas bog‘liqdir. Mintaqa aholisi 25 yildan so‘ng 100 million kishidan ortishi kutilayotgan bir vaqtda unumli yerlar tez sur’atlar bilan qisqarib bormoqda.

Bugungi kunda mintaqadagi umumiy yer maydonining 20 foizdan ortig‘i degradatsiyaga uchragan. Chorak asrdan keyin hosildorlik uchdan bir qismga kamayib ketishi mumkin», – dedi Mirziyoyev.

Davlat rahbari Amudaryo va Sirdaryoda suv oqimi kamayishi natijasida 2040-yilga borib Markaziy Osiyo mamlakatlari yuqori darajadagi suv taqchilligiga duch kelishi mumkinligini ta’kidladi.

«Biz allaqachon insoniyatning eng yirik fojialaridan biri – Orol dengizi qurishi oqibatlarini boshdan kechirmoqdamiz. Biz suv resurslarini tejash maqsadida irrigatsiya tizimlarini betonlashtiryapmiz. Suvni tejaydigan texnologiyalarni ishlab chiqarish bo‘yicha sanoat bazasini yaratdik, sug‘oriladigan yerlarning deyarli yarmida ana shunday texnologiyalarni joriy etdik. (Bu salkam ikki million gektar yer maydoni demakdir). Bunday chora-tadbirlar natijasida o‘tgan yili 8 milliard metr kub suvni tejashga muvaffaq bo‘ldik», – dedi Prezident.

Mirziyoyev nutqi davomida tomonlarni Markaziy Osiyoda suvni tejaydigan texnologiyalarni joriy etish borasidagi sa’y-harakatlarni birlashtirish va bu sohada mintaqaviy dasturni ishga tushirishga chaqirdi. Bu rejalarning barchasini ekspertlar muhokamasidan o‘tkazish uchun Orolbo‘yi mintaqasida xalqaro forum o‘tkazishni maqsad qilganini aytib o‘tdi.

«Muzliklarning holati va mintaqadagi tog‘ ekotizimlarida yuzaga kelishi mumkin bo‘lgan xavf-xatarlarni oldindan baholash uchun sun’iy yo‘ldosh orqali uzluksiz kuzatuvlarni yo‘lga qo‘yish bo‘yicha «Kopernik» dasturi doirasida Yevropa Ittifoqi bilan yaqin hamkorlikka umid qilamiz», – dedi davlat rahbari.

Mirziyoyev Orol muammosi haqidagi nutqi so‘nggida Toshkentdagi «Yashil universitet» bazasida yaratilgan Iqlim rezidensiyasi Markaziy Osiyoda kechayotgan iqlim jarayonlarini o‘rganish va monitoring qilish bo‘yicha umumiy ilmiy-ekspertlik platformasi bo‘lib xizmat qilishi mumkinligini aytib o‘tdi.

Shuningdek, 5-apreldan Nukus shahrida mintaqaning ekologik muammolariga san’at sohasidagi loyihalar orqali e’tiborni jalb etishga qaratilgan Orol madaniyat sammiti o‘z ishini boshlashini ma’lum qildi.