4-aprel, juma kuni Samarqand shahrida Yevropa Ittifoqining Markaziy Osiyo mintaqasi va ushbu mintaqa davlatlari: O‘zbekiston, Qozog‘iston, Qirg‘iziston, Tojikiston va Turkmaniston bilan munosabatlarining muhim siyosiy yangilanishiga bag‘ishlangan «Yevropa Ittifoqi – Markaziy Osiyo» birinchi sammiti bo‘lib o‘tdi.

Qayd etilishicha, Yevropa Ittifoqi va Markaziy Osiyo strategik sheriklik orqali hamkorlikni keyingi bosqichga olib chiqishni maqsad qilgan. Bu muhim qo‘shma siyosiy majburiyat har ikki mintaqaga tinchlik, xavfsizlik va barqaror rivojlanish yo‘lida birgalikda ishlash imkonini beradi.

Mazkur sammit doirasida Yevroittifoq Global Gateway dasturi doirasida 12 mlrd yevro hajmidagi investitsiya paketini e’lon qildi.

Investitsiya paketi mintaqa uchun muhim bo‘lgan to‘rtta sohaga yo‘naltiriladi: transport (3 mlrd yevro), kamyob muhim minerallar (2,5 mlrd yevro), gidroenergetika va iqlim (6,4 mlrd yevro) hamda sun’iy yo‘ldosh interneti (100 mln yevro).

Shuningdek, Yevropa tiklanish va taraqqiyot banki 2027 yilgacha muhim minerallar va qayta tiklanuvchi energiya kabi sohalarni o‘z ichiga olgan taxminan 7−8 mlrd yevrolik loyihalar paketini ishlab chiqmoqda.