O‘zbekiston Professional futbol ligasi mehnatga haq to‘lashning eng kam miqdorining (MHTEKM) 5 barobaridan kam shartnomalarni ro‘yxatdan o‘tkazmasligini ma’lum qildi.

Tashkilotga ko‘ra, bu yosh futbolchilarni qo‘llab-quvvatlash maqsadi bilan bog‘liq.

«Liga ro‘yxatidan o‘tadigan mehnat shartnomalarida minimal oylik-maosh belgilab qo‘yilgan bo‘lib, unga ko‘ra klub o‘z futbolchisiga O‘zbekistonda mehnatga haq to‘lashning eng kam miqdoridan kam bo‘lmagan summada maosh belgilashi lozim.

Tahlillar shuni ko‘rsatmoqdaki, professional futbol klublarida oylik-maoshlarning yuqori miqdori oshishda davom etmoqda, biroq yosh iqtidorlarni rag‘batlantirish masalasida qator muammolar mavjud», – deyiladi rasmiy ma’lumotda.

Qayd etilishicha, mehnatga haq to‘lashning eng kam miqdori ko‘rinishida maosh olayotgan futbolchida o‘zining oylik chiqimlarini qoplash bilan bog‘liq qiyinchiliklar bor. Shundan kelib chiqib, O‘zbekiston Professional futbol ligasi hamda O‘zbekiston futbolchilari uyushmasi hamkorlikda O‘zbekiston futbol assotsiatsiyasiga mazkur masalada qo‘shma taklif kiritgan.

Har uch tashkilot hamkorlikda yakdil qaror qabul qilguniga qadar esa PFL mehnatga haq to‘lashning besh barobar miqdoridan kam bo‘lgan mehnat shartnomalarini ro‘yxatdan o‘tkazmaydi.