O‘zbekiston joriy yilning 1-oktyabriga qadar Qozog‘istonga 16 milliard kub metr suv jo‘natadi. Bu borada Qozog‘iston suv xo‘jaligi va irrigatsiya vaziri Nurjan Nurjigitov hamda O‘zbekiston suv xo‘jaligi vaziri Shavkat Hamrayev ikki tomonlama suv hamkorligini chuqurlashtirish bo‘yicha qo‘shma ishchi guruhining 12-yig‘ilishida kelishib olgan.

Tomonlar o‘tgan suv xo‘jaligi yilida (2023-yil oktyabr – 2024-yil oktyabr) Qozog‘istonga 15 milliard kub metr suv jo‘natilganini ta’kidladilar. Shunday qilib, joriy suv xo‘jaligi yilida bu hajmni 1 milliard kub metrga oshirish kutilmoqda.

O‘zbekiston tomoni 2025-yilgi sug‘orish mavsumida Do‘stlik kanali orqali barqaror suv ta’minotini ham ta’minlashga ko‘maklashadi.

Bundan tashqari, vazirlar Qozog‘istonning Turkiston viloyati va O‘zbekistonning Jizzax viloyati fermerlarining suv ta’minotini yaxshilash imkonini beruvchi davlatlararo kanallarda ta’mirlash ishlarini birgalikda olib borishga kelishib olishgan.

«Muhokama qilinadigan yana bir mavzu Sirdaryoda suvni hisobga olishni avtomatlashtirish bo‘ldi. Biz ilgari har bir mamlakatda bunday tizimlar o‘rnatiladigan dastlabki 10 ta – har ikki davlatda 5 tadan nuqtani belgilab oldik. Bugun biz loyihaning texnik-iqtisodiy asoslarini ishlab chiqish uchun texnik shartlarni kelishib oldik. Fevral oyida qo‘shma ishchi guruhning xalqaro tashkilotlar vakillari ishtirokidagi yig‘ilishi bo‘lib o‘tadi, unda kelgusidagi harakatlar muhokama qilinadi», – deydi Qozog‘iston suv xo‘jaligi va irrigatsiya vaziri Nurjan Nurjigitov.