Токио университети олимлари титандан илк қуёш панелини ясашди. Титан диоксиди (TiO₂) ва селен (Se) асосидаги қуёш панели кремнийли одатий панелларга нисбатан солиштириб бўлмас даражада кўп электр ишлаб чиқаради, дейилади Unión Rayo портали хабарида.

Титанли панеллар кремнийли панеллардан 1000 баравар кучли бўлиши мумкин.

Бироқ фавқулодда чидамли ва коррозияга бардошли бу металл ўта қиммат. Шу боис тадқиқотчилар титанни ишлаб чиқаришнинг нисбатан арзон йўлларини ҳам қидиришмоқда, жумладан, уни тозалашда иттрийдан фойдаланишни таклиф этишяпти. Анъанавий усуллар эса жуда юқори ҳарорат ва таннархи анча қимматга тушувчи кимёвий жараёнлардан иборат.

Нодир минераллар таркибида мавжуд иттрий деярли барча соҳаларда — ёруғлик диодли экранлардан тортиб ўта юқори ўтказувчиларгача қўлланилмоқда. Айни ҳолатда эса унинг аҳамияти нисбатан камхарж тозалаш қобилиятига эгалиги ва титан учун қуёш энергетикаси томон йўл очиш имкониятига эгалигида.

Бироқ якуний титан маҳсулотида иттрийнинг микроскопик қолдиқлари қолади, бу унинг яроқлилик муддатига салбий таъсир кўрсатиши табиий. Тадқиқотчилар олдида ана шу муаммони ҳал этиш масаласи турибди.

«Агар тадқиқотчилар бу тўсиқдан ошиб ўтишса, титан инқилоби тикланувчи энергия ишлаб чиқаришни бутунлай ўзгартириб юбориши мумкин», — деб ёзди нашр.