Ҳиндшунос олим, Ўзбекистонда хизмат кўрсатган маданият ходими, Ёзувчилар уюшмаси аъзоси Амир Файзулло 76 ёшида вафот этди.

У «Маҳобҳорат», «Мирзо Ғолиб», «Рамаяна», «Бобур» сериаллари, «Сангам», «Бавжу Байра», «Она» каби бадиий фильмларни ҳинд тилидан ўзбек тилига таржима қилган. Бундан ташқари, А.Файзулло кўплаб таниқли ҳинд ёзувчиларининг асарларини ўзбек тилига ўгирган.

Амир Файзулла 1945 йил 15 январда Ғаллаорол туманида туғилган. 1963 йилда Тошкент Давлат университетининг Шарқшунослик факультетига ўқишга кириб, ҳиндшунос-филолог ихтисосига эга бўлган. Ҳиндий, урду ва рус тилларидан ўзбек тилига 30 дан ортиқ роман ва қисса, 400 сериядан ортиқ ҳинд фильмини таржима қилган, юзлаб публицистик ва илмий-маърифий мақолалар муаллифи. «Маҳобҳорат» ва «Рамаяна» кинолари таржимаси ўзбек томошабинлари томонидан қизғин кутиб олинган. 1984 йилдан Ўзбекистон Ёзувчилар уюшмаси аъзоси, 2000 йилда эса Ўзбекистонда хизмат кўрсатган маданият ходими унвони билан тақдирланган. Жорий йил 10 апрель куни ҳинд тили ва адабиётининг дунё бўйлаб тарғиботи ва ташвиқотига қўшган ҳиссалари учун Ҳиндистоннинг «Др. Жорж Грирсон» халқаро мукофотига сазовор бўлган. «Жаҳон адабиёти» журналининг Шарқ бўлими мудири лавозимида фаолият кўрсатган.

Xabar.uz жамоаси марҳумнинг оила аъзолари ва яқинларига ҳамдардлик билдиради.