Samarqandda avtobus saloniga ayollar va erkaklarni alohida turishga chaqiruvchi yorliq viloyat transport boshqarmasi aralashuvi bilan olib tashlandi.

Boshqarma axborot xizmati bergan ma’lumotga ko‘ra, joriy yil 29-oktyabr kuni ijtimoiy tarmoqlarda shahar avtobus yo‘nalishlarida harakatlanuvchi avtobuslardan birining salon qismida «yo‘lovchilarning erkin harakatlanishini cheklovchi so‘zlar» yozilganligi yuzasidan murojaat tarqalgan. Bu viloyat transport boshqarmasidan nazoratga olinib, holat 22-sonli «Navbog‘ mahallasi - Pistamozor mahallasi» yo‘nalishda harakatlanuvchi, davlat raqami belgisi 30/306 VBA bo‘lgan transport vositasida sodir bo‘lgani aniqlangan.

«Keskin muhokamalarga sabab bo‘lgan yozuv olib tashlandi», – deyiladi boshqarma xabarida.

Idora mutasaddilari, shuningdek, jamoat transportida bunday «e’tirozli holatlar takrorlanmasligi uchun Murojaatda keltirilgan holatlar yuzasidan xizmat ko‘rsatuvchi korxonada haydovchilar o‘rtasida tushuntirish ishlari» olib borishgan.