Prezident yordamchisi Saida Mirziyoyeva kecha, 4-aprel kuni Samarqandda bo‘lib o‘tgan Markaziy Osiyo Iqlim forumi borasida o‘z fikrini bildirdi.

«O‘zbekistonning iqlim o‘zgarishiga qarshi kurashdagi sa’y-harakatlarini taqdim etish men uchun katta sharafdir.

Markaziy Osiyo — tabiiy omillarga eng ta’sirchan mintaqalardan biri hisoblanadi: 70 yil davomida bu hududda harorat 1,5–2 darajaga ko‘tarilgan. Orol fojiasi esa global ekologik inqirozning ramziga aylangan», – dedi Mirziyoyeva.

U, shuningdek, Prezident tashabbusi bilan «Markaziy Osiyoning yashil rivojlanish» konsepsiyasi ishlab chiqilayotgani, bu yashil texnologiyalardan tortib barqaror urbanizatsiyagacha bo‘lgan barcha sohalarni to‘la qamrab olishini ta’kidlab, ushbu konsepsiyaning COP30 forumida qabul qilinishiga umid bildiradi.

«Orolbo‘yi va Qoraqalpog‘istonni rivojlantirish shaxsan men uchun ustuvor vazifadir. Bu borada uchta yo‘nalishda — ekologiya, infratuzilma va madaniy tiklanish bo‘yicha ish olib boryapmiz. Ertaga Nukusda ochilishi bo‘lib o‘tadigan Orol madaniyat sammiti ham fan, san’at va jamiyat o‘rtasida o‘ziga xos muloqot maydoni bo‘lib xizmat qilishi kutilmoqda.

Biz muloqot va hamkorlikka ochiqmiz. Faqatgina birgalikda biz Yer yuzini asrab qolishimiz va farzandlarimiz, nabiralarimiz hamda bizdan keyingi barcha avlodlar uchun yaxshiroq kelajakni barpo etishimiz mumkin», – deydi Prezident yordamchisi.