Ijtimoiy tarmoqlarda Namangan viloyati Pop tumanidagi shifoxonada 36 yoshli erkakda shifokorlar tomonidan noto‘g‘ri jarrohlik amaliyoti o‘tkazilganligi oqibatida vafot etganligi haqida xabar tarqalgan edi.

Namangan viloyati prokuraturasi bergan ma’lumotga ko‘ra, joriy yil 27-mart kuni Pop tumani IIB navbatchilik qismiga shu tumanning «Chinor» mahallasida yashagan 36 yoshli Xojiakbar Kirgizovning tuman tibbiyot birlashmasida vafot etganligi haqidagi xabar kelib tushgan.

X.Kirgizov o‘zi faoliyat yuritib kelgan fermer xo‘jaligiga qarashli traktor tirkamasidan joriy yil 13-mart kuni yiqilib tushib tan jarohati olgan va o‘sha kuni tuman tibbiyot birlashmasiga olib kelingan bo‘lgan. Tuman tibbiyot birlashmasi reanimatsiya bo‘limida o‘tkazilgan jarrohlik amaliyoti va tibbiy muolajalarga qaramasdan, u joriy yilning 27-mart kuni vafot etgan.

Mazkur holat yuzasidan sudga oid tibbiy ekspertizasi tayinlangan.

«Shuningdek, shifokorlarning xatti-harakatlari yuzasidan xizmat tekshiruvi tayinlangan.

Hozirda Pop tumani prokuraturasi tomonidan tergovga qadar tekshiruv harakatlari o‘tkazilmoqda.

Holat Namangan viloyati prokuraturasi tomonidan nazoratga olingan», – deyiladi viloyat prokuraturasi xabarida.