OpenAI раҳбари Сэм Алтман Apple компаниясининг собиқ дизайнери Жони Айв билан ҳамкорликда одатий смартфонлар ўрнини эгаллаши кутилаётган сунъий интеллектли қурилма яратишга киришилганини маълум қилди. Бу ҳақда Android Authority хабар берди.

Сунъий интеллект компютерлар билан алоқага ёндашувларни тубдан ўзгартиришни талаб этмоқда ва келажакда овоз фойдаланувчи интерфейсининг асосий воситасига айланади. Ишлаб чиқилаётган қурилма овоз ёрдамида бошқарилади, деди Алтман.

Бундай қурилмалар олдин ҳам ишлаб чиқарилган, бироқ оммалашмаган, сунъий интеллектга асосланган Humane AI Pin ва Rabbit R1 шулар жумласига киради. Турли шакл ва функцияларда тақдим этилган сунъий интеллектли қурилмалар мавжуд, аммо OpenAI мутлақо ўзига хос қурилма таклиф этиши кутиляпти.

Алтманнинг айтишича, бу қурилманинг иш унумдорлигини ва қувват тежамкорлигини таъминлаш учун компания ўз микрочипларини ишлаб чиқаради.

Янги қурилма дизайни ва қандай функцияларга эгалиги ҳозирча сир тутилмоқда.