17 февраль куни Оққўрғон тумани ИИБга Охунбобоев кўчасидаги хонадонларнинг бирида яшовчи 3 нафар фуқаро вафот этганлиги, 4 нафари эса «номаълум этиологик заҳарланиш» ташхиси билан шифохонага ётқизилганлиги ҳақида хабар келиб тушган.

Кўрсатилган тез-тиббий муолажаларга қарамасдан шифохонага келиб тушган беморларнинг 1 нафари вафот этган, дейилади Бош прокуратура матбуот хизмати хабарида.

Ўлим сабаби озиқ-овқат ёки ис газидан заҳарланиш бўлиши мумкинлиги айтилмоқда, воқеа жойини кўздан кечириш давомида экспертиза текшируви учун «қовурилган балиқ» ва «мош кичира» овқати қолдиқлари, «помидор-бодринг» тузламалари, олчадан тайёрланган «компот» қолдиқлари, хонадонда тайёрланган «холодец» қолдиқлари, 10 литр хажмдаги баклашкадаги сув ҳамда бошқа озиқ-овқат маҳсулотларидан намуналар олинди, дейилади хабарда.

Марҳумларнинг ўлими сабабларини аниқлаш мақсадида судга оид тиббий экспертиза тайинланган.

Оққўрғон тумани прокуратураси томонидан терговга қадар текширув ўтказилмоқда.