Самарқанд шаҳрида «Марказий Осиё глобал иқлим муаммолари қаршисида: умумий фаровонлик йўлида бирлашиш» мавзусидаги Халқаро иқлим форуми иш бошлади.

Тадбир давомида қандай масалалар кўриб чиқилиши режалаштирилган?

Марказий Осиё мамлакатлари раҳбарлари, Европа Иттифоқи раҳбарияти, БМТ ва бошқа халқаро ташкилотлар вакиллари ва экспертлар, олимлар, фаоллар  иштирок этаётган форумда иқлим хавфлари ва экологик таҳдидларнинг олдини олиш борасидаги ҳаракатлар мувофиқлаштирилиши кутилмоқда.

Марказий Осиёга хавф қандай?

Тадбирда таъкидланганишича, Марказий Осиёда иқлим исиши кўрсаткичи дунёдагига қараганда 2 баробар тезроқ содир бўлмоқда. Сув захиралари камайиб бормоқда, абадий музликлар қисқаряпти, тупроқ заифлашиб, ҳосилдорлик пасайиб бормоқда. Бу ҳолат ўз навбатида аҳолининг кундалик ҳаётига таъсир кўрсатиб боряпти.

Ўзбекистон ушбу хавфларга бугунданоқ теран назар ташламоқда ва экологияни сақлаш учун бир қатор чора-тадбирлар амалга ошириляпти. Хусусан, тадбир иштирокчилари томонидан Орол денгизининг қуриган тубини яшиллаштириш борасида амалга оширилаётган ишлар олқишлаб ўтилди.

Аммо бу етарлими? Яна қандай ишларни жадаллаштириш лозим? Тадбирда шу ҳақда гап кетди.

«Яшил» иқтисодиётга ўтиш

Яшил иқтисодиёт – инсоннинг ресурсларга нисбатан масъулиятли муносабатини назарда тутувчи иқтисодий ривожланиш моделидир. У иқтисодий ўсиш ва табиий бойликларни сақлаб қолиш ўртасидаги оқилона муросани топишга қаратилган.

Бугун ер ости ва ер усти бойликлари орқа-олдига қарамасдан, пала-партиш сарфланадиган бўлса, яқин келажакда катта муаммолар юзага келиши турган гап. Форум давомида яшил иқтисодиёт бўйича бир қатор фикрлар алмашилмоқда.

Барқарор шаҳар ривожланиши

Шаҳарларнинг барқарор ривожланиши – экологик мувозанатга эришишда муҳим аҳамият касб этади. Бугунги кунда шаҳар муаммоларини ҳал қилиш, шаҳарликларнинг турмуш шароитлари ва ҳаёт сифатини яхшилашда табиат ресурсларидан ўринли фойдаланиш катта аҳамиятга эга.

Сув ресурсларини биргаликда бошқариш

Марказий Осиёнинг энг катта муаммоларидан бири - сув етишмовчилигидир. Бу муаммо яқин йилларда янада кескинлашиши кутилмоқда.

Бу жараёндан фақатгина биргаликда ишлаш орқали чиқиб кетиш мумкин. Форум давомида айнан шундай мақсадлар илгари сурилади.

Экологик тоза энергетикани ривожлантириш

Ўзбекистон бу борада олдинга жуда катта қадам ташлади. 2030 йилга бориб юртимизда яшил энергетиканинг улушини 54 фоизга етказиш мақсад қилинган.

Юртимизда жорий йил «Атроф-муҳитни муҳофаза қилиш ва «яшил» иқтисодиёт йили» деб эълон қилингани ҳам бежиз эмас.

Ёшлар, илм-фан ва иқлим

Ёшлар – жамиятнинг энг фаол ва ҳаракатчан қатлами. Улар янги ғояларга очиқ, инновацион ечимларни излашга тайёр ва келажакка катта умид билан қарашади.

Форум давомида иқлим ўзгариши муаммосини ҳал қилиш учун ёшлар ва илм-фан биргаликда ҳаракат қилишлари кераклиги таъкидланди.

Xabar.uz мухбири