Ўзбекистон ташқи ишлар вазири Бахтиёр Саидов кеча, 18 февраль куни Канада ва Испаниянинг янги тайинланган элчиларидан ишонч ёрлиқларини қабул қилиб олди.

Ўзбекистон ТИВ раҳбари, жумладан, Канаданинг Ўзбекистондаги янги элчиси Кристофер Дуггандан ишонч ёрлиқларини қабул қилиб олиш маросими ҳақида тўхталиб, халқаро майдонда минтақанинг глобал роли кенгайиб бораётгани ҳамда Ўзбекистон Канада давлати билан алоқаларида ҳали рўёбга чиқмаган катта салоҳият кўраётганини таъкидлайди. 

Шунингдек, Бахтиёр Саидов Испаниянинг янги тайинланган элчиси Рикардо Мартинес Васкесдан (қароргоҳи Москва шаҳрида жойлашган) ишонч ёрлиқларини қабул қилиб олган.

«Мамлакатларимиз ўртасидаги икки томонлама муносабатлар динамикаси юқорига қараб кетаётганлиги яққол намоён бўлмоқда. Икки мамлакат ташқи ишлар вазирликлари биргаликда ҳаётга татбиқ этиши лозим бўлган улкан имкониятларни алоҳида эътироф этдик. Жаноб элчига Ўзбекистон-Испания ҳамкорлигининг янги йўналишларини ривожлантиришда ва самарали фаолият олиб боришида омад тилаймиз», – деб ёзади Ўзбекистон ТИВ раҳбари.

Бугун, 19 февраль куни эса Эстониянинг Ўзбекистондаги янги тайинланган Элчиси Яап Ора ҳам Ўзбекистон ТИВ раҳбарига ишонч ёрлиқларини топширди.

«Элчи жаноблари билан Ўзбекистон ва Эстония давлатлари ўртасидаги икки ва кўп томонлама муносабатларнинг ҳозирги динамикасини муҳокама қилдик. Иқтисодий дипломатия, ахборот технологиялари, халқлар ўртасидаги алоқалар, маданият ва бошқа соҳалардаги ҳамкорлигимизни ривожлантиришга алоҳида эътибор қаратдик. Жаноб Элчига мамлакатимизда муваффақиятли фаолият юритишида омад тилаймиз», – дейди бу ҳақда Саидов.