АҚШда Meta раҳбари Марк Цукербергни Миртл-Бич (Жанубий Каролина штати)даги ёнғинларда айблаш кампанияси авж олди. Штатда 175 дан зиёд ёнғин ўчоқлари пайдо бўлгани, хавфли ҳудудлар аҳолиси кўчирилгани ҳақида хабар бергандик.

Ҳукумат вакиллари баёнотига кўра, ҳаммаёқ қуруқлиги ва кучли шамоллар туфайли ёнғинлар жуда кенг тарқалди ва ўт ўчирувчилар тилсиз ёв қаршисида ожиз қолишди. Шунга қарамасдан, ижтимоий тармоқларда фитна назарияси ҳам тарқалмоқда, эмишки, технологиялар соҳаси катта шахсларининг ёнғинда қўли бор, уларнинг мақсади — Миртл-Бични «ақлли шаҳар»га айлантириш. Миш-мишларнинг кўпи бевосита Цукербергга бориб тақалмоқда.

Цукербергни фазовий мақсадлар учун мўлжалланган қандайдир лазер қуроли ёрдамида ёнғинлар ҳосил қилишда айблашмоқда.

Миш-мишлар ортидан турган фаоллардан бири Жон Сабалнинг таъкидлашича, йўналтирилган энергияли қурол қўлланилиб катта ёнғинлар ҳосил қилинган. Унинг баёноти полицияни ҳам қизиқтириб қўйди, чунки ёнғинлар уюштирилгани ҳақида тахминлар ҳам йўқ эмас эди.