Toshkent Xalqaro aeroportida yig‘ilgan 30 nafar fuqaro, safari amalga oshmaganidan so‘ng firibgarlarga duch kelganidan xabar topishdi.

Buxoro viloyati IIB mas’ulining «Xabar.uz»ga ma’lum qilishicha, kuni kecha 30 nafar fuqaroni Umra ziyoratiga yuborishni va’da qilib, yirik miqdordagi pullarni o‘zlashtirgan ikki shaxs  qo‘lga olindi.

Holatga ko‘ra, Buxoro shahridagi Foshun mahallasi fuqarosi R.S.  1996-yilda tug‘ilgan jinoiy sherigi F.K. bilan til biriktirib, tegishli litsenziyaga ega bo‘lmasa-da, fuqarolarga  Farg‘ona viloyati, Marg‘ilon shahrida joylashgan mas’uliyati cheklangan jamiyat orqali 12 kunlik «Umra» safari loyihasini taqdim etishgan. Ziyoratga borish istagida bo‘lgan 30 nafar fuqaroning har biridan 1 300 AQSh dollaridan, jami 45 500 AQSh dollari yig‘ib, o‘z manfaatlari yo‘lida o‘zlashtirishgan.

Umra safariga yaxshi niyat bilan bormoqchi bo‘lgan fuqarolar esa Toshkent xalqaro aeroportida yig‘ilishganda, firibgarlarga duch kelishganini anglab yetishgan va uylariga tarqalishgan.

Ayni paytda mazkur holat yuzasidan jinoiy guruh a’zolariga nisbatan O‘zbekiston Respublikasi Jinoyat kodeksining 168-moddasi (Firibgarlik) bilan ish qo‘zg‘atilib, dastlabki tergov harakatlari davom ettirilmoqda.

Bundan ilgariroq Umra ziyoratiga yuborishni va’da qilgan turfirma xodimi ushlangani xabar qilingan edi.