Prezident Mirziyoyev Parij shahrida bo‘lib o‘tgan XVII yozgi Paralimpiya o‘yinlarida yuksak natijalarga erishgan sportchi va murabbiylardan bir guruhini mukofotlash to‘g‘risidagi Farmonni imzoladi.

Hujjatga muvofiq, mamlakatda jismoniy tarbiya va sportni rivojlantirish, xalqimiz o‘rtasida sog‘lom turmush tarzini targ‘ib qilish borasidagi alohida xizmatlari, ko‘plab nufuzli xalqaro musobaqalarda ulkan yutuqlarni qo‘lga kiritayotgani, xususan, Fransiyaning Parij shahrida bo‘lib o‘tgan XVII yozgi Paralimpiya o‘yinlarida o‘zining azmu shijoati va mahorati, mustahkam iroda va jasoratini namoyon etib, yuqori natijalarga erishgani, terma jamoa safida muvaffaqiyatli qatnashib, O‘zbekistonning jahon miqyosidagi shon-shuhratini yuksaltirishga salmoqli hissa qo‘shgani hamda yosh avlodni milliy g‘urur va vatanparvarlik, sabot-matonat ruhida tarbiyalash yo‘lidagi ibratli faoliyati uchun 49 nafar sportchi va murabbiylar mukofotlanadi.

Jumladan:

• «O‘zbekiston iftixori» faxriy unvoni bilan – 7 nafar sportchi;
• «O‘zbekiston Respublikasida xizmat ko‘rsatgan sportchi» faxriy unvoni bilan – 9 nafar sportchi;
• «O‘zbekiston Respublikasida xizmat ko‘rsatgan sport ustozi» faxriy unvoni bilan – 6 nafar murabbiy;
• «Fidokorona xizmatlari uchun» ordeni bilan – 1 nafar sportchi;
• «Mehnat shuhrati» ordeni bilan – 2 nafar sportchi, 2 nafar murabbiysi hamda O‘zbekiston Milliy paralimpiya qo‘mitasi raisi;
• «Do‘stlik» ordeni bilan – 6 nafar murabbiy va O‘zbekiston Milliy paralimpiya qo‘mitasi bosh kotibi;
• «Jasorat» medali bilan – 5 nafar sportchi;
• «Shuhrat» medali bilan – 2 nafar murabbiy, 5 nafar sportchi, 1 nafar O‘zbekiston dzyudo federatsiyasi psixologi hamda 4 nafar O‘zbekiston Milliy paralimpiya qo‘mitasi xodimi mukofotlandi.

Izoh: to‘liq ro‘yxat bilan ushbu havola orqali tanishish mumkin.