Barselona universiteti arxeologlari Afrika shimolidagi ulkan Mag‘rib hududida (hozirgi Marokash) bronza davriga odamlar yashagan manzilni topishdi. Tadqiqot natijalari Antiquity jurnalida e’lon qilindi.

Yaqin-yaqinlargacha bu hududda ilk boshpanalarni finikiyaliklar miloddan 800 yillar avval kelib qurgan deb hisoblab kelingan.

Marokash shimoli-g‘arbidagi Kax-Kouch manzilgohida olib borilgan qazishmalar davomida miloddan avvalgi 2200 va 600-yillar oralig‘iga mansub qishloq topildi. Bu Kax-Kouchning O‘rta Yer dengizi Afrikasida Misrdan keyingi eng qadimiy odamlar manzili ekanligini isbotlovchi dalildir.

Kax-Kouch manzilgohi Lau daryosi yaqinidagi bir gektarga yaqin maydonda joylashgan.

Taxminlarga ko‘ra, miloddan avvalgi 2200–2000-yillarda bu yerga dastlabki odamlar kelib o‘rnashgan.

Miloddan avvalgi 1300–900-yillar oralig‘ida esa manzilda barqaror qishloq xo‘jaligi jamiyati paydo bo‘lgan va u finikiyaliklarga qadar Mag‘ribda o‘troq hayot shakllanganidan dalolat beradi.

Manzilgohning miloddan avvalgi 800–600-yillarni qamrab olgan tarixiy bosqichida esa O‘rta Yer dengizining sharqidan keltirilgan madaniyat belgilari (kulolchilik, temir buyumlar, tosh asosida yangicha qurilish an’analari)ni ko‘rish mumkin.