Hindshunos olim, O‘zbekistonda xizmat ko‘rsatgan madaniyat xodimi, Yozuvchilar uyushmasi a’zosi Amir Fayzullo 76 yoshida vafot etdi.

U «Mahobhorat», «Mirzo G‘olib», «Ramayana», «Bobur» seriallari, «Sangam», «Bavju Bayra», «Ona» kabi badiiy filmlarni hind tilidan o‘zbek tiliga tarjima qilgan. Bundan tashqari, A.Fayzullo ko‘plab taniqli hind yozuvchilarining asarlarini o‘zbek tiliga o‘girgan.

Amir Fayzulla 1945-yil 15-yanvarda G‘allaorol tumanida tug‘ilgan. 1963-yilda Toshkent Davlat universitetining Sharqshunoslik fakultetiga o‘qishga kirib, hindshunos-filolog ixtisosiga ega bo‘lgan. Hindiy, urdu va rus tillaridan o‘zbek tiliga 30 dan ortiq roman va qissa, 400 seriyadan ortiq hind filmini tarjima qilgan, yuzlab publitsistik va ilmiy-ma’rifiy maqolalar muallifi. «Mahobhorat» va «Ramayana» kinolari tarjimasi o‘zbek tomoshabinlari tomonidan qizg‘in kutib olingan. 1984-yildan O‘zbekiston Yozuvchilar uyushmasi a’zosi, 2000-yilda esa O‘zbekistonda xizmat ko‘rsatgan madaniyat xodimi unvoni bilan taqdirlangan. Joriy yil 10-aprel kuni hind tili va adabiyotining dunyo bo‘ylab targ‘iboti va tashviqotiga qo‘shgan hissalari uchun Hindistonning «Dr. Jorj Grirson» xalqaro mukofotiga sazovor bo‘lgan. «Jahon adabiyoti» jurnalining Sharq bo‘limi mudiri lavozimida faoliyat ko‘rsatgan.

Xabar.uz jamoasi marhumning oila a’zolari va yaqinlariga hamdardlik bildiradi.