Украина Олий Радасининг энергетик хавфсизлик бўйича қўмитаси раҳбари Виктория Гриб Украина Запорожье АЭС устидан назоратни қайта тиклашни режалаштираётгани ҳақида маълум қилган ва бунда Россия мазкур қадамга қандай шартлар асосида рози бўлишини тахмин қилолмаслигини айтган эди.

Бир муддат ўтиб эса Трамп Запорожье АЭСни АҚШ мулкига ўтказиш мумкинлиги ҳақида баёнот билан чиқди. Хусусан, АҚШ Давлат котиби Марко Рубио ва миллий хавфсизлик бўйича президент маслаҳатчиси Майк Уолц Оқ уй раҳбарининг сўзларига қўшимча қилиб, АЭСни АҚШ мулкига айлантириш Украина энергетика инфратузилмасини ҳимоя қилишнинг энг яхши усули бўлиши мумкинлигини билдирганди.

Россия ТИВ эса Запорожье АЭСнинг келажаги билан боғлиқ ОАВ хабарлари юзасидан баёнот бериб, Запорожье АЭС Россиянинг ядровий объекти эканлигини билдирди.

«2022 йил сентябр ойининг охирида бўлиб ўтган референдумлардан сўнг Луганск ва Донецк республикалари ҳамда Херсон ва Запорожье вилоятлари Россия Федерациясининг таркибига тўлиқ кирган. Президентнинг 2022 йил 5 октябрдаги 711-сонли Фармони билан эса Запорожье АЭСнинг Россия юрисдикцияси остидаги объект сифатидаги мақоми белгилаб қўйилган», – дейилади баёнотда.

Шу билан биргаликда, ЗАЭСнинг Украина ёки бошқа давлатга топшириш ҳамда уни бошқа бир давлат билан биргаликда эксплуатация қилиш мумкин эмаслиги таъкидланади.

Маълумот учун, Запорожье АЭС Днепрнинг чап қирғоғида, Энергодар шаҳри яқинида жойлашган. Бу блоклар сони ва ўрнатилган қуввати бўйича Европадаги энг йирик атом электр станцияси ҳисобланади. Станцияда ҳар бири 1 гигаватт қувватга эга олтита энергия блоки мавжуд.