Хабарлар тезкор Телеграм каналимизда Обуна бўлиш ×

«Вақф» фонди раҳбарига «иш» очилган, бироқ бу фонд билан алоқадор эмас

«Вақф» фонди раҳбарига «иш» очилган, бироқ бу фонд билан алоқадор эмас

Ижтимоий тармоқларда Ўзбекистон мусулмонлари идораси фаолиятига оид тарқатилаётган ёлғон маълумотларга муносабат билдирар экан, идора «Вақф» хайрия жамоат фонди раҳбарига нисбатан жиноят иши қўзғатилгани, бироқ бу унинг мазкур вазифага киришишдан олдинги фаолияти билан боғлиқ эканини билдирди.

Қайд этилишича, олиб борилган тергов жараёнларида Фонд маблағларини ноўрин сарфлаш ва ўзлаштириш ҳолатлари ўз тасдиғини топмаган.

«Фонд ўз фаолиятини қонунчилик ҳужжатлари ва Васийлик кенгаши қарорлари асосида олиб боради. Мазкур Кенгаш Фонд фаолиятининг динимиз талаблари ва қонунчилик ҳужжатларига мувофиқлигини мунтазам назорат қилиб боради», – дейилади ЎМИ хабарида.

Идора, шунингдек, ҳақиқатга тўғри келмайдиган хабарларнинг бирида умра зиёратчилари учун нимча ва сумка бўйича ўтказилган танлов ҳақида ҳам асосланмаган маълумотларга тўхталиб ўтган. Таъкидланишича, мамлакатда ҳаж ва умра сафарини ташкил этиш ишлари Ҳукуматнинг 2017 йил 7 июндаги 364-сонли қарор асосида амалга оширилади. Ушбу қарорга илова қилинган Низомнинг 17-бандида зиёратчилар учун кийим-кечак ва сумка тайёрлаб берувчи ташкилотларни танлаш учун алоҳида тендер (танлов) ўтказиш ва тендер (танлов) хулосаларини Жамоатчилик кенгашига киритиш ва Жамоатчилик кенгаши қарорига асосан тендер (танлов)да ғолиб чиққан ташкилотлар билан шартномалар тузиш белгиланган.

«Ҳар йили нимча (камзул) ва сумка тайёрлаб бериш бўйича алоҳида очиқ танлов ўтказилади ва бу ҳақда ОАВда эълонлар берилади. Унда фирмалар томонидан тақдим этилган бир қатор ҳужжатлар билан бирга нимча (камзул) ва сумка намуналари сифати ва нархи мутахассислар томонидан ўрганилиб, уларнинг якуний хулосаси Жамоатчилик кенгашига киритилади», – дейилади Ўзбекистон Мусулмонлари идораси муносабатида.

Идоранинг қўшимча қилишича, 2024 йилнинг 1-12 ноябрь кунлари Адлия вазирлиги мутахассислари, солиқ идоралари ходимлари томонидан Диний идорада қонунчилик ҳужжатлари бажарилиши ва молиявий фаолиятларнинг қонунийлиги юзасидан ўрганиш ишлари олиб борилган.

Ўрганишлар якуни бўйича Адлия вазирлигининг 2024 йил 18 ноябрь кунидаги 21/5-978/9-сонли тақдимномасида Диний идорада молиявий камомад ва ноқонуний хатти-ҳаракатлар мавжуд эмаслиги қайд этилган. Бундан ташқари, Тафтиш комиссияси Ўзбекистон мусулмонлари идорасининг 2021-2024 йиллардаги молиявий фаолиятини батафсил текшириб, мазкур жараёнлар амалдаги қонунчиликка мувофиқ экани тўғрисида Ўзбекистон мусулмонлари идораси Олий Ҳайъатига ҳисобот берган. 

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг