АҚШ президенти Доналд Трамп Россия жосуси экани ҳақидаги иддаолар кўпдан буён муҳокама қилиб келинади. Қозоғистон Миллий хавфсизлик қўмитаси собиқ раиси, бир пайтлар КГБда, яъни Совет Иттифоқи махсус хизматида фаолият юритган Алнур Мусаевнинг ижтимоий тармоқлардаги пости Трампнинг ўтмиши ҳақидаги муҳокамаларни янгидан кучайтирди. 

«Мен 1987 йилда Москвада Совет Иттифоқи КГБсининг 6-бошқармасида ишлар эдим. 6-бошқарманинг муҳим йўналишларидан бири капиталистик мамлакатлар бизнесменларини оғдириш эди. Айни ўша йили бошқарма АҚШлик 40 ёшли тадбиркор Доналд Трампни «Краснов» тахаллуси билан ҳамкорлик учун ёллаган эди», – деб ёзади генерал Алнур Мусаев.

X платформасида чоп этилган ва бир миллиондан зиёд фойдаланувчи ўқиган хабарда ҳам Трамп «Краснов» номи остида Совет Иттифоқи махсус хизмати билан ҳамкорлик қилгани иддао қилинади.

Буюк Британия парламенти аъзоси Грэм Стюарт Трампнинг «рус агенти» экани ҳақида пост ёзгани оловга мой сепгандек таъсир қилди.

Сўнгги вақтларда Трамп Украина босқини борасида Россияга ён боса бошлагани ортидан бу каби баҳсли маълумотлар жамоатчилик томонидан ҳақиқат ўлароқ қабул қилинмоқда дейиш мумкин.

Алнур Мусаев Трамп КГБ томонидан оғдирилганини тасдиқловчи ҳужжат илова қилмаган.

Euronews ўрганишларига кўра, генерал Мусаевнинг постидаги бир жиҳат шубҳа уйғотади. У Трампни КГБнинг 6-бошқармаси ёллагани ҳақида ёзади. Аммо манбаларга кўра, мазкур бошқарма чет элликларни ёллаш билан эмас, балки иқтисодий йўналишдаги жосусликка қарши кураш билан шуғулланган. 

Қайд этиш ўринлики, 2021 йилда америкалик журналист ва ёзувчи Крейг Ангер ҳам «Американча компромат» китобида Трамп Москва билан яширин равишда ҳамкорлик қилгани ҳақида ёзганди. Крейг Ангернинг ахборот манбаси эса КГБнинг собиқ агенти  Юрий Швец ҳисобланади.

Крейг Ангерга кўра, махсус хизмат билан ҳамкорликнинг «агент» ёки «актив» каби икки шаклини ажратиб олиш лозим бўлади.

«Агент разведкага ишлаб, маош олса, актив ишончли дўст сифатида кўмак кўрсатади», – дейди у.

Юрий Швецнинг Крейг Ангерга сўзлаб беришича, Трамп 1980 йилда Нью-Йоркда биринчи йирик меҳмонхонасини (Grand Hyatt New York) очган вақтда совет эмигрантига тегишли дўкондан 200 дона телевизор харид қилган. Мазкур дўкон КГБнинг яширин тузилмаси бўлгани сабаб ўша пайтдаёқ Трамп «актив» сифатида Москванинг эътиборига тушган.

1987 йили Трамп илк бор Совет Иттифоқига сафар қилади. Сафардан кўзланган мақсад меҳмонхона очиш имкониятларини ўрганиш деб кўрсатилган. Юрий Швецнинг шоҳидлик беришича, сафар давомида Трамп сўзлашувлари совет жосуслари томонидан яширинча тингланган.

АҚШ матбуотида эълон қилган мақолада ҳикоя қилинишича, СССР тарқалганидан кейин ҳам Трампнинг Москвада бизнес юритишга бўлган қизиқиши сўнмаган. У 1996 йилда Москвага яна бир карра ташриф буюриб, қимматбаҳо тураржой мажмуаси қуриш имкониятини ўрганган. 2006 йилда эса Трампнинг ўғли ва қизи ҳам Москвада меҳмон бўлган.

«Politico» нашри мақоласида ҳам Трампнинг 1987 йилги сафари КГБ томонидан ташкил этилгани қайд этилган.

Трамп 2017 йилда АҚШ президенти этиб сайланиши ортидан унинг Россия билан алоқалари хусусида шубҳа-гумонлар яна кун тартибига қайтган. АҚШ адлия вазирлиги 2016 йилги сайловга Россиянинг таъсири масаласини ўрганиш учун махсус комиссия тузган. Комиссия «Россия ҳукумати ва Трампнинг сайлов кампанияси ўртасида алоқалар мавжудлиги»ни аниқлаган бўлса-да, Трамп жамоаси Россия ҳукумати билан тил бириктиргани ҳолати юзасидан далил  топа олмаган.

Трампнинг ўзи эса 2019 йилда Россия билан ҳамкорлик қилгани ва Москва фойдасига ишлаганини буткул рад этган.