Владимир Путин АҚШнинг сайланган президенти Доналд Трамп билан Россия-Украина уруши бўйича музокаралар ўтказиши кутилмоқда.

Bloomberg нашрининг Кремлдаги манбаларга таяниб хабар беришича, учрашув чоғида Путин Украинадан НАТО билан ҳарбий алоқаларни узиш ва чекланган армияга эга нейтрал давлатга айланишни талаб қилади.

Жанг майдонида рус қўшинларининг устунлигига тобора кўпроқ ишонч ҳосил қилган Путин Украинанинг НАТОга аъзо бўлишдан бош тортишига эришмоқчи ва мамлакатнинг ҳарбий салоҳиятини чекламоқчи.

Шу билан бирга, Кремл Шимолий Атлантика алянсининг алоҳида мамлакатлари Киевни икки томонлама хавфсизлик келишувлари доирасида қурол-яроғ билан таъминлашига қарши эмас, аммо бу қуроллар Россияга ва у томонидан босиб олинган Украина ҳудудларини қайтариш учун ишлатилмаслиги керак.

Кремл, шунингдек, Россия босиб олган Украина ҳудудининг камида 20 фоизи устидан назоратни сақлаб қолишни талаб қилади. Бунга аннекция қилинган Қрим ҳам киради.

Аввалроқ Доналд Трамп Россия-Украина урушига чек қўйиш учун Владимир Путин билан учрашмоқчи эканлигини айтганди. Учрашув қачон ўтказилиши ҳали маълум эмас.