Ижтимоий тармоқларда Наманган вилояти Поп туманидаги шифохонада 36 ёшли эркакда шифокорлар томонидан нотўғри жарроҳлик амалиёти ўтказилганлиги оқибатида вафот этганлиги ҳақида хабар тарқалган эди.

Наманган вилояти прокуратураси берган маълумотга кўра, жорий йил 27 март куни Поп тумани ИИБ навбатчилик қисмига шу туманнинг «Чинор» маҳалласида яшаган 36 ёшли Хожиакбар Киргизовнинг туман тиббиёт бирлашмасида вафот этганлиги ҳақидаги хабар келиб тушган.

Х.Киргизов ўзи фаолият юритиб келган фермер хўжалигига қарашли трактор тиркамасидан жорий йил 13 март куни йиқилиб тушиб тан жароҳати олган ва ўша куни туман тиббиёт бирлашмасига олиб келинган бўлган. Туман тиббиёт бирлашмаси реанимация бўлимида ўтказилган жарроҳлик амалиёти ва тиббий муолажаларга қарамасдан, у жорий йилнинг 27 март куни вафот этган.

Мазкур ҳолат юзасидан судга оид тиббий экспертизаси тайинланган.

«Шунингдек, шифокорларнинг хатти-ҳаракатлари юзасидан хизмат текшируви тайинланган.

Ҳозирда Поп тумани прокуратураси томонидан терговга қадар текширув ҳаракатлари ўтказилмоқда.

Ҳолат Наманган вилояти прокуратураси томонидан назоратга олинган», – дейилади вилоят прокуратураси хабарида.