Европа парламентининг франциялик аъзоси Вашингтонни «Озодлик ҳайкали»ни қайтаришга чақирди. Ҳайкал 1886 йил Америка мустақиллигининг 100 йиллиги муносабати билан француз халқи томонидан совға қилинган.

Депутат Рафаэль Глюксманн АҚШнинг ҳозирги сиёсати ҳамда Доналд Трамп маъмуриятининг қарорлари мамлакатнинг озодлик қадриятларига содиқ эмаслигини кўрсатаётгани учун ҳам Франция ҳайкални ортга қайтариши кераклигини таъкидлайди.

«Биз золимлар томонини танлаган америкаликларга, илмий эркинлик талаб қилган тадқиқотчиларни ишдан бўшатган америкаликларга: «Бизга Озодлик ҳайкалини қайтариб беринглар!» деб айтамиз», – дейди у тарафдорларига.

«Биз уни сизга ҳадя қилган эдик, лекин сиз бу рамзни ҳурмат қилмаяпсиз. Шундай экан унга ўз уйи яхшироқ», – деди депутат «Place publique» партияси йиғилишидаги чиқишида.

Глюксманн, шунингдек, Франциядаги ўта ўнг қанот етакчиларини танқид қилиб, уларни Трамп ва президентнинг харажатларни қисқартириш борасидаги саъй-ҳаракатларига бошчилик қилаётган миллиардер Илон Маскнинг «фан-клуби» аъзолигида айблади.

Маълумот учун, француз ҳайкалтароши Август Бартолди томонидан ишланган «Озодлик ҳайкали» монументи 1886 йил 28 октябрда Америка Мустақиллик декларациясининг 100 йиллиги муносабати билан Нью-Йоркдаги Озодлик оролига ўрнатилган.