Кеча, 4 апрел куни, Самарқанд шаҳрида Туризм қўмитаси раиси Умид Шадиев Озарбайжон Республикаси Давлат туризм агентлиги раис ўринбосари Азада Гусейнова билан учрашди.

Музокаралар давомида томонлар туризм соҳасининг жорий ҳолати, ҳамкорлик истиқболлари ва қўшма туризм ташаббусларини ривожлантириш масалаларини батафсил муҳокама қилдилар.

Учрашув якунида «Миллий ПР-маркази» давлат унитар корхонаси ва Озарбайжон Республикаси Туризм кенгаши ўртасида ўзаро англашув меморандуми имзоланди. Мазкур ҳужжат Буюк Ипак йўли бўйлаб ягона сайёҳлик йўналишини ривожлантириш ва тарғиб этишга қаратилган.

Ҳамкорликнинг асосий мақсади «Joint Silk Road Highlights Tour» ташаббуси доирасида икки мамлакатнинг сайёҳлик ресурсларини бирлаштириш ҳисобланади. Лойиҳа Марказий Европа мамлакатларида сайёҳлик йўналишларини биргаликда тарғиб қилишни, шунингдек, Ипак йўлининг Боку, Шемаха, Шеки, Хива, Бухоро ва Самарқанд каби муҳим тарихий жойларига эътибор қаратишни кўзда тутади.

Меморандум доирасида томонлар қўшма B2B тадбирлари ўтказиш, роуд-шоу ташкил этиш ва халқаро сайёҳлик кўргазмаларида иштирок этиш бўйича келишувга эришдилар.

Ҳужжат имзоланганидан сўнг, Озарбайжон делегацияси Самарқанддаги Туризм академиясига ташриф буюрди. У ерда меҳмонлар таълим дастурлари, инфратузилма ва туризм соҳасида кадрлар тайёрлаш истиқболлари билан танишиш имкониятига эга бўлдилар.

Ўзбекистон ва Озарбайжон, Ипак йўлининг марказий қисмидаги етакчи сайёҳлик йўналишлари сифатида, кўпроқ сайёҳларни жалб этиш, тарихий жойларнинг машҳурлигини ошириш ва жаҳон туризм бозорида ўз мавқеларини мустаҳкамлаш мақсадида стратегик ҳамкорлик ўрнатишга киришмоқда. Меморандумнинг имзоланиши икки мамлакат ўртасидаги сайёҳлик алоқаларини кучайтириш муҳимлигини таъкидлаб, соҳани янада ривожлантириш учун янги имкониятлар яратмоқда.