22 сентябр куни бўлиб ўтган референдумда Швейцария аҳолиси ҳукумат илгари сураётган пенсия ислоҳотига қарши овоз берди, дейилади Bloomberg хабарида.

Ислоҳот пенсияни қайта ҳисоблаш коэффициентини 6,8 фоиздан 6 фоизга камайтиришни назарда тутарди, унинг асосида пенсия тўловлари миқдори ҳисоблаб чиқилади. Дастлабки маълумотларга кўра, сайловчиларнинг фақат учдан бир қисми қонун лойиҳасини қўллаб-қувватлаган. Энди Швейцария ҳукумати муқобил пенсия ислоҳоти ҳақида бош қотиришига тўғри келади.

Март ойида ҳам Швейцарияда референдум ўтказилган ва аксарият аҳоли католикларнинг Рождество байрами арафасида 13-пенсия (13-ойлик каби) берилишини маъқуллаганди. Шунинг баробарида, швейцарияликлар пенсия ёшини 65 дан 66 ёшга ошириш таклифини рад этишди.

Ҳисоб-китобларига кўра, пенсия ислоҳотининг қабул қилинмаслиги оқибатида давлат бюджетига йилига 4 млрд швейцар франки ($4,52 млрд атрофида) миқдорида босим тушади. Аммо яқин йилларда пенсияларни тўлаш учун пулдан муаммо бўлмайди, дея ваъда бермоқда ҳукумат ўз халқига.