АҚШ мудофаа вазирлиги E-130J самолётини лойиҳалаш ва қуриш учун Northrop Grumman мудофаа-қурилиш корпорацияси билан қарийб 3,5 миллиард доллар қийматидаги шартнома имзолади.

E-130J самолёти мамлакат ядровий бошқарув учлиги — АҚШ президенти, Пентагон раҳбари (мудофаа вазири) ва Марказий қўмондонликни ўзаро боғловчи Boeing E-6B Mercury ҳаво кемаси ўрнини эгаллаши кутилмоқда.

Пентагон баёнотига кўра, самолёт TACAMO жанговар алоқа тизимини замонавийлаштириш дастури доирасида яратилмоқда. Янги ҳаво кемаси қурилишини 2034 йил декабрида ниҳоясига етказиш мўлжалланган.

Мавзуга доир: «Қиёмат куни» самолётини яратишга $13 млрд сарфланади

АҚШнинг «қиёмат куни» самолёти дея таърифланувчи Boeing E-6 Mercury ҳаво кемаси ноябр ойининг бошида Испаниядаги Рота авиабазасига келиб қўнганди.

Ушбу самолёт АҚШ ҳарбий-денгиз кучларининг баллистик ракеталарга эга атом сувости кемаларини захира алоқа тизими билан таъминлаш ҳамда Қўшма Штатлар қуролли кучлари бирлашган стратегик қўмондонлиги учун ҳаво қўмондонлик пункти вазифасини бажаради.