Украина Қуролли Кучларининг Курск вилоятидаги операцияси тез орада якунланиши кутилмоқда. Унинг тугашига бир неча ҳафтадан бир неча кунгача вақт кетиши мумкин, деб ёзмоқда Испаниянинг El Pais газетаси Украина армиясининг номи ошкор этилмаган вакилларига таяниб. 

Тармоқда россиялик аскарлар Суджа шаҳри марказига киргани тасвирлари тарқалмоқда. 

Нашрнинг ёзишича, Курск вилоятидаги украиналик ҳарбий хизматчилар Вашингтоннинг Киевга ҳарбий ёрдамни тўхтатиб қўйиши оқибатларини қаттиқ ҳис қилмоқда. 

11 март куни Россия Мудофаа вазирлиги Курск вилоятидаги 12 аҳоли пункти озод қилингани ҳақида хабар берди. 9 март куни эрталаб департамент армия Лебедевка қишлоғи (Курск вилояти) ва Новенкое қишлоғини (Украинанинг Суми вилояти) эгаллаб олганини маълум қилди. Кечга яқин рус қўшинлари Малая Локня, Черкасское Поречное ва Косица аҳоли пунктларини эгаллашди. 8 март куни россиялик ҳарбий мулозим Апти Алаудинов Россия армияси Курск вилоятида кенг кўламли ҳужум бошлаганини маълум қилди. 

Курск вилоятидаги жанглар 2024 йил 6 августдан бери давом этмоқда. Минтақада фавқулодда ҳолат ва терроризмга қарши кураш режимлари ўрнатилган, эвакуация эълон қилинган. 2025 йил январ ойида Россия Мудофаа вазирлиги  801 квадрат километрга яқин ҳудудда назорат тиклангани ҳақида хабар берди.