Дарем университети (Буюк Британия) олимлари аниқлашича, юқори даромадли одамлар қорин тўйганини келиб чиқиши нисбатан паст ижтимоий қатлам вакилларига нисбатан яхшироқ ҳис этишади. Тадқиқот натижалари Food Quality and Preference (FQР) журналида эълон қилинди.

Тажрибада турли ижтимоий қатламларга мансуб 96 талаба қатнашди. Уларнинг ҳар бирининг олдига 70 бўлакдан сутли шоколад билан тўла ликопчалар қўйилиб, истаганларича тановул қилиш, шунинг баробарида, ширинлик мазасига баҳо бериш таклиф этилди.

Дегустация жараёнида олимлар юрак уришининг вариабеллигини ўлчашди. Бу кўрсаткич мия ва ичак ўртасидаги алоқани, қолаверса, очлик ва тўқлик ҳиссини тартибга солувчи «дайди нерв»нинг фаоллигини акс эттиради.

Тадқиқот етакчи муаллифи Марио Вейкнинг айтишича, нисбатан ўзига тўқ оилалардан чиққан қатнашчилар тананинг ички сигналларига қулоқ тутиб, тўқликни ҳис этишлари билан ейишни тўхтатишган. «Кам таъминланган» оилаларда ўсган талабаларда тана сигналлари кучсиз бўлиб, меъёрдан ортиқ ейиш айнан улар ўртасида кўпроқ кузатилди.

Шу пайтгача овқатланиш кўникмалари қатор ташқи омиллар, хусусан, овқатланиш имкониятлари ҳамёнбоплигига қараб шаклланади, деган тушунча бор эди. Янги тадқиқот инсон қанчалик ўз танаси сигналларини сезиши ҳам муҳимлигини кўрсатмоқда. Ҳозирча тажриба шоколад билан ўтказилди, энди олимлар бу эффект бошқа таом турлари билан қандай юз беришини синаб кўришмоқчи.