Donald Trampning tashqi yordamni to‘xtatish va insonparvarlik missiyalarini moliyalashtirishni qisqartirish to‘g‘risidagi farmoni Afg‘onistonda yashovchi olti milliondan ortiq insonni oziq-ovqat yetishmovchiligiga ro‘baro‘ qilishi mumkin, deb xabar berdi Reuters.

BMT Jahon oziq-ovqat dasturi ma’lumotiga ko‘ra, Afg‘onistonda taxminan 15 million kishi oziq-ovqat taqchilligidan aziyat chekmoqda.

Ayni vaziyatda yetkazilayotgan oziq-ovqat ularning yarmiga ham yetmasligi xavfi bor. «Bu kuniga bir yoki ikki marta, shunda ham faqat choy va non bilan jon saqlayotgan 6 milliondan ziyod odamlar. Afsuski, yordamdan mahrum qilingan ko‘plab odamlar uchun vaziyat ayni paytda shunday», — dedi BMT Jahon oziq-ovqat dasturining Afg‘onistondagi rahbari Syao-Vey Reuters jurnalistlari bilan suhbatda.

Mamlakat iqtisodiyotidagi muammolar tolibon Afg‘onistonni qo‘lga olganidan so‘ng boshlangan. Shundan so‘ng insonparvarlik ko‘magi ko‘rsatuvchi notijorat tashkilotlar uchun Afg‘onistonga kirish qiyinlashdi.

Ma’lumot uchun: 2024-yilda Afg‘onistonga yo‘naltirilgan insonparvarlik missiyalarining 40 foizidan ziyodrog‘ini AQSh moliyalashtirgan. Trampning farmoni afg‘onistonliklarga ancha mushkulotlar tug‘dirishi tayin.