O‘zbekiston delegatsiyasining Malayziyaga xizmat safari davomida hamkor davlat bilan aqlli qishloq xo‘jaligi texnologiyalari va dronlar ishlab chiqarish, sholichilik, baliqchilik, kauchuk yetishtirish, meva-sabzavot va ipak mahsulotlarini eksport qilish kabi yo‘nalishlarda amaliy hamkorlik ishlarini boshlashga kelishib olindi.

Xususan, Malayziyaning Meraque kompaniyasi bilan hamkorlikda Toshkent viloyatining Yangiyo‘l tumanidagi Qishloq xo‘jaligini mexanizatsiyalashtirish ilmiy-tadqiqot instituti hududida aqlli qishloq xo‘jaligi texnikalari va dronlarni mahalliylashtirgan holda ishlab chiqarish bo‘yicha kelishuv imzolandi.

Bundan tashqari, Malayziya Qishloq xo‘jaligi tadqiqotlarini rivojlantirish instituti va O‘zbekiston Respublikasi Qishloq xo‘jaligi vazirligi huzuridagi Qishloq xo‘jaligida bilim va innovatsiyalar markazi o‘rtasida imzolangan kelishuv asosida Malayziyalik seleksioner olimlar tomonidan yaratilgan sho‘rga va suvsizlikka chidamli, qora, uzun hamda aromatik sholi navlarini O‘zbekistonda tajriba sifatida ekib ko‘paytirish uchun urug‘lar olib kelinadi. Shu bilan birga, O‘zbekistonda yetishtirilgan «devzira» sholi urug‘lari Malayziyaga jo‘natiladi.

Malayziya Qishloq xo‘jaligi va oziq-ovqat xavfsizligi vazirligining Baliqchilik departamenti hamda «O‘zbekbaliqsanoat» uyushmasi hamkorligida O‘zbekistonda Malayziyaning yangi texnologiyalari asosida intensiv baliqchilik, bioflok va krivetka yetishtirish loyihalari yo‘lga qo‘yiladi.

Malayziya Qishloq xo‘jaligi marketing agentligi bilan hamkorlikni rivojlantirish orqali O‘zbekistonda yetishtirilgan meva-sabzavot va ipak mahsulotlarini eksport qilish yo‘lga qo‘yiladi.

Shuningdek, Malayziyaning Jakim tashkiloti bilan hamkorlikda O‘zbekistonlik fermerlar va tadbirkorlar uchun «Halol» sertifikati olish bo‘yicha o‘quv kurslarini tashkil etish borasida kelishuvga erishildi.

Bo‘lib o‘tgan tadbirlarda O‘zbekiston va Malayziya o‘rtasidagi ushbu hamkorlik loyihalari ikki davlat qishloq xo‘jaligi sohasining innovatsion rivojlanishiga va mahsulotlar eksportini kengaytirishga xizmat qilishi ta’kidlandi.