11-fevral kuni O‘zbekistonda xizmat ko‘rsatgan madaniyat xodimi, O‘zbekiston Yozuvchilar uyushmasi a’zosi, shoir va tarjimon Boris Pak vafot etdi. Bu haqda Yozuvchilar uyushmasi xabar berdi. 

Boris Pak 1932-yilda Koreya Respublikasida tug‘ilgan. U O‘zbekistonga to‘rt yoshligida kelgan. Toshkent davlat pedagogika instituti (hozirgi Toshkent davlat pedagogika universiteti)ni tamomlagan.

Boris Pak rus tilida ijod qilgan. Ayni paytda sof o‘zbek tilida gaplashgan. Uning ilk kitobi “Ti po zvyozdam idyosh” (“Yulduzlar bo‘ylab borasan”) 1968-yilda chop etilgan. Shu paytga qadar uning bolalar uchun “Zagadki – otgadki” (“Topishmoqlar – javoblar”, 1969), “Kak Petrushka s’yel vatrushku”, (“Petyajon qanday qilib suzmali paramachni yedi”, 1972), “Uchimsya dumat” ( “Fikrlashni o‘rganamiz”, 1978), “Zvyozdnaya lebed” (“Yulduzlar aro oqqush”, 1986), “Lunniye kacheli” (“Oy halinchagi”, 2008), “Solnishko” (“Quyoshcha”, 2016) kabi qator she’riy to‘plamlari, shuningdek, “Vremya byot, ne selyas, v visok...” (“Vaqt shapaloq tushirar kutilmaganda”, 2011) nomli saylanmasi nashr etilgan. Ko‘pgina she’rlari kuyga solingan bo‘lib, ular bugungacha bolalar tomonidan sevib ijro etib kelinadi, qo‘shiqlari turli yillarda gramplastinkalarga yozilib, tarqalgan.

Boris Pakning “Pesnya nash drug” (“Qo‘shiq hamrohimiz”), “Slushayte malishi” (“Tinglang, bolajonlar”), “Podorojnik” (“Bargizub”) va boshqa she’rlariga bastalangan qo‘shiqlar O‘zbekiston Milliy teleradiokompaniyasi fondida saqlanadi.
Boris Pak Yusuf Shomansur, Xayriddin Saloh, To‘lqin, Ma’ruf Jalil, Oshiq Erkin kabi o‘zbek, Xolmurat Saparov, Sa’dulla Abbazov kabi qoraqalpoq, Amet Mefayev, Reshid Murat, Seytumer Emin kabi tatar shoirlarining she’rlarini rus tiliga tarjima qilgan. Uning she’rlari o‘zbek, qoraqalpoq, qozoq, qirg‘iz, bolgar, koreys, ozarbayjon va boshqa tillarga tarjima qilinib, chop etilgan.

1992-yilda u “O‘zbekistonda xizmat ko‘rsatgan madaniyat xodimi” faxriy unvoni bilan mukofotlangan.