Туризм қўмитаси Даниянинг Хернинг шаҳрида 21-23 феврал кунлари ўтаётган Скандинавия (Шимолий Европа) минтақасида энг йирик туризм ярмаркаси бўлган «Danish Travel Show»да иштирок этмоқда. Мамлакатимизнинг туризм салоҳияти ушбу тадбирда биринчи марта МДҲ давлатлари орасида ягона иштирокчи сифатида намоён қилинмоқда.

Қўмита томонидан Ўзбекистон Республикасининг Швеция Қироллигидаги Элчихонаси ва туристик компаниялар иштирокида ташкил қилинган мамлакатимиз стендида Ўзбекистонга ушбу минтақадан туристлар оқимини янада кўпайтиришга қаратилган турли тадбирлар ўтказилмоқда. Жумладан, иштирокчиларга туризм салоҳияти тарғиботи бўйича қатор тақдимотлар, бошқа мамлакатларга турлар уюштирадиган йирик маҳаллий ва халқаро туроператорлар билан «G2B» va «B2B» учрашувлар, туризм маркетингига ихтисослашган журнал ва онлайн платформалар билан музокаралар ўтказилмоқда.

Ушбу тадбирда 40 га яқин давлат, жумладан, Хитой, Ҳиндистон, Шри Ланка, Тайланд, Туркия, Малайзия, Индонезия, Грузия, АҚШ, Германия, Австрия, Испания, Португалия, Чехия, Словакия, Полша, Дания, Исландия, Швеция, Норвегия, Мексика, Кук Ороллари, Танзания, Кения ва Угандадан 1000 дан ортиқ туризмга ихтисослашган ташкилотлари ва соҳа вакиллари қатнашмоқда. Уч кун давом этадиган тадбирга бу йил 60 000 атрофида меҳмонлар ташриф буюриши кутилмоқда.