2 нафар фарзандим бор. Эрим билан ажрашганмиз. Суд ажраштирганда фарзандларим билан кўришиш ҳуқуқини белгилаган. Бироқ ҳар сафар дадаси билан кўришиб келишганда фарзандларимнинг менга нисбатан муносабати ўзгариб қолади. Дадаси уларга мен ҳақимда турли бўҳтонларни айтиб, мен ҳақимдаги фикрларини ўзгартириб қўяди. Айтингчи, ушбу ҳолатда нима қилсам бўлади?

Ушбу саволга юридик фанлар бўйича фалсафа доктори, доцент Акбаршоҳ Тешабоев изоҳ берди:

— Агар собиқ турмуш ўртоғингиз фарзандларингизни сизга бўлган тўғри муносабатини ўзгартириб қўяётган ва у бераётган маълумотлар болаларнинг тарбиясига салбий таъсир кўрсатаётган бўлса, у ҳолда сизнинг оналик ҳуқуқларингиз суд томонидан ҳимоя қилинади.

Жумладан, Оила кодексининг 75-моддаси иккинчи қисмига мувофиқ, «Ота-оналик ҳуқуқини амалга оширишда ота-она болаларининг жисмоний ва руҳий соғлиғига, ахлоқий камолотига зарар етказишга ҳақли эмас».

Ушбу модданинг учинчи қисмига мувофиқ, «Ўз ота-оналик ҳуқуқини болаларининг ҳуқуқ ва манфаатларига зид тарзда амалга ошираётган ота-она қонунда белгиланган тартибда жавобгар бўлади».

Олий суд Пленумининг «Болалар тарбияси билан боғлиқ низоларни ҳал қилишда судлар томонидан қонунларни қўллаш амалиёти тўғрисида»ги Қарори 7-бандига мувофиқ, «суд ота-онанинг ҳуқуқини амалга оширишда ота-она болаларнинг жисмоний ва руҳий соғлиғига, ахлоқий камолотига зарар етказишга ҳақли эмаслигидан келиб чиқиб, суд ота-онанинг бола билан кўришиш тартибини белгилаш ҳақидаги даъвосини, қабул қилинган қарорда асослантирган ҳолда рад қилишга ҳақли».

Сиз билдираётган важларингизни асослантирувчи далиллар билан олдинги ҳал қилув қарорини чиқарган судга болаларингизнинг отасини улар билан кўришиш тартибини бекор қилиш ёки қайтадан кўриб чиқиш ҳақида мурожаат қилишингиз мумкин. Суд эса аризангизни кўриб чиқиб, тегишли ва қонуний қарор чиқариб беради.

Унутманг, ҳеч ким болаларга уларнинг онаси ҳақида ёмон гаплар айтишга ҳақли эмас!