Тошкент Халқаро аэропортида йиғилган 30 нафар фуқаро, сафари амалга ошмаганидан сўнг фирибгарларга дуч келганидан хабар топишди.

Бухоро вилояти ИИБ масъулининг «Xabar.uz»га маълум қилишича, куни кеча 30 нафар фуқарони Умра зиёратига юборишни ваъда қилиб, йирик миқдордаги пулларни ўзлаштирган икки шахс  қўлга олинди.

Ҳолатга кўра, Бухоро шаҳридаги Фошун маҳалласи фуқароси Р.С.  1996 йилда туғилган жиноий шериги Ф.К. билан тил бириктириб, тегишли лицензияга эга бўлмаса-да, фуқароларга  Фарғона вилояти, Марғилон шаҳрида жойлашган масъулияти чекланган жамият орқали 12 кунлик «Умра» сафари лойиҳасини тақдим этишган. Зиёратга бориш истагида бўлган 30 нафар фуқаронинг ҳар биридан 1 300 АҚШ долларидан, жами 45 500 АҚШ доллари йиғиб, ўз манфаатлари йўлида ўзлаштиришган.

Умра сафарига яхши ният билан бормоқчи бўлган фуқаролар эса Тошкент халқаро аэропортида йиғилишганда, фирибгарларга дуч келишганини англаб етишган ва уйларига тарқалишган.

Айни пайтда мазкур ҳолат юзасидан жиноий гуруҳ аъзоларига нисбатан Ўзбекистон Республикаси Жиноят кодексининг 168-моддаси (Фирибгарлик) билан иш қўзғатилиб, дастлабки тергов ҳаракатлари давом эттирилмоқда.

Бундан илгарироқ Умра зиёратига юборишни ваъда қилган турфирма ходими ушлангани хабар қилинган эди.