2025 йилда «Янги Ўзбекистон» ва бошқа массивларда кўп квартирали уй-жойлар қуришнинг мақсадли кўрсаткичлари тасдиқланди.

Шунингдек, жорий йил 1 мартдан «Янги Ўзбекистон» массивлари учун янги ҳудудлар урбанизация тамойилларига мувофиқ танланади.

Бу борада Президентнинг «Уй-жой ва ипотека бозорини янада ривожлантиришга оид қўшимча чора-тадбирлар тўғрисида»ги ПФ-26-сон фармони қабул қилинди.

Фармонга кўра, 2025 йилда бозор тамойилларига асосланган ипотека кредитлари орқали аҳолини уй-жой билан таъминлаш дастурининг асосий йўналишлари этиб қуйидагилар белгиланди:

• ҳудудларда жами 8,1 млн метр квадратдан иборат 135 минг квартирали уй-жойларни қуриш;
• ипотека кредитлари бўйича дастлабки бадал ва фоиз тўловларининг бир қисмини қоплаш учун субсидиялар сонини 1,5 бараварга ошириш ва мазкур мақсадларга Давлат бюджетидан 2,5 трлн сўм йўналтириш;
• уй-жой ва ипотека бозорини молиявий ресурслар билан таъминлаш учун 20,9 трлн сўм миқдоридаги ипотека кредитларини ажратиш;
• «Янги Ўзбекистон» ва бошқа массивларда кўп квартирали уй-жойларни барпо қилишда иштирок этадиган қурилиш ташкилотларини айланма маблағлар билан таъминлаш учун Давлат бюджетидан 700 млрд сўм ҳамда тижорат банкларининг ўз маблағлари ҳисобидан 3,0 трлн сўм миқдоридаги маблағларни йўналтириш.