Япония жанубий-ғарбий соҳилидаги Нанкай ёриғида кучли зилзила содир бўлиши мумкин. Мамлакат ҳукумати эҳтимолий табиий офат зарарларини баҳолади.

Манбага кўра, зилзила 298 минг ҳаётига зомин бўлиши мумкин. Зилзила бўлиш эҳтимоли 80 фоизга баҳоланмоқда.

Таъкидланишича, сейсмик интенсивлик Япония шкаласи бўйича 10 та префектурада максимал 7 баллга етади, 24 та префектурада эса 6 дан паст ёки ундан юқори бўлади. Баландлиги камида 10 метр бўлган цунами Токио ва бошқа 12 префектурани ҳам қамраб олиши мумкин. Баъзи ҳудудларда у 30 метр баландликка етади.

Цунами кўплаб йўқотишларга сабаб бўлиши тахмин қилиняпти ва зилзиладан бир ҳафта ўтиб 12,3 миллион киши ёки Япония аҳолисининг 10 фоизи эвакуация қилиниши мумкин. Табиий офатдан кўриладиган иқтисодий зарар 270,3 триллион иенни ташкил қилади, бу давлат бюджетидан икки баробар кўпдир.

Мамлакат расмийлари аҳолини табиий офатга таёргарлик кўришни тавсия қилмоқда.

Эслатиб ўтамиз, 28 март куни Мяньма ва Таиландда 7,7 магнитудали зилзила содир бўлди. Зилзила оқибатида қурбон бўлганлар сони 3085 кишидан, жароҳатланганлар сони эса 4715 нафардан ошди.