Хитойда дунёдаги энг баланд кўприк қурилади, деб ёзади Oddity Central.

Хитойнинг Гуйчжоу провинциясида янги жаҳон рекордини ўрнатадиган кўприк қурилиши ниҳоясига етмоқда. Бейпан дарёси бўйлаб ўтган Huajiang Grand Canon кўприги сув сатҳидан 625 метр баландликда жойлашган ва 2025 йилнинг иккинчи ярмида транспорт ҳаракати учун очилади. Лойиҳа минтақада анъанани давом эттиради – Гуйчжоуда аллақачон дунёдаги 100 та энг баланд кўприкнинг ярмидан кўпи жойлашган.

Қурилиш 2022 йил январ ойида бошланган ва ҳозирда 95% бажарилган. Guizhou Highway Group бош муҳандиси Чжан Шенглиннинг сўзларига кўра, кўприк “Хитой инфратузилмаси кучини кўрсатувчи яна бир муҳим лойиҳа” бўлади. У Бейпан дарёси водийсининг "Ер ёриғи" деб номланувчи энг чуқур қисмидаги қирғоқларни боғлаб, ўтиш вақтини бир соатдан бир дақиқага қисқартиради.

Кўприк ўзининг транспорт функциясидан ташқари, янги туристик диққатга сазовор жой бўлиши ваъда қилинмоқда. Миноралардан бирида панорамали кўринишга эга шиша лифт, юлдузларни томоша қилиш учун бар ва кафе бўлади. Саргузашт изловчилар учун шиша полга эга кузатув майдончаси ва дунёдаги энг баланд сакраш жойи мавжуд.